خليها تصدي تفاعل الشعب يجبر اصحاب الكروش والضمائر الميتة علي الصح

لو صبرنا لحد شهر ٦ هينزل موديل ٢٠٢٠ على موديل ٢٠١٩ على موديل ٢٠١٨ اللي قاعد عند الوكيل وما اتباعش هنبقى اجبرنا الشركة المصنعة على الضغط على الوكيل لانه مش عارف يحقق التارجت وهيضطر يعتذر ويحط سعر معقول
في ألمانيا لما ارتفع سعر البيض الشعب عمل مقاطعة والتجار نزلوا السعر واعتذروا وبرضه الشعب فضل مقاطع
قام التجار نزلوا السعر اقل من السعر الاصلي وبدأوا حملات اعتذار واعلانات على التلفزيون عشان الناس تشتري

ملخص كدا بسيط عن نتائج الحملة
١- تقريبا مفيش ولا عربية فى الشارع ٢٠١٩
٢- مفيش بيع ولا شراء
٣- المعارض بتنش بمعنى الكلمه وكل عروضها الناس مطنشاها
٤- تخفيضات بحجة وبدون حجة وصلت ل ٤٠ الف جنية_ فى الكورى _ اللى مش فى الإتفاقية اصلا وبرده مفيش بيع ولا شراء
٥- على المستوى العام  تقريبا انا أغلب الشعب  مأجلين الشراء للاتفاق مع الحملة
٦- الوكلاء يوميا بيدفعو ارضيات جمارك بالملايين
٧- حالة عند من الوكلاء والتجار ورهان على صبرنا ،،، وغالبا احنا الطرف الفائز
٨- اللى بيشترو حاليا على مستوى مصر تعدهم عالايد الواحدة ولا يمثلوا حتى ٥℅ من تارجت البيع لدى الوكلاء
٩-الكارثة الكبرى فى موديلات ٢٠١٨ اللى مركونة فى كل معرض وارضيات الوكلاء
١٠- شهور بسيطة ويبدأ نزول موديلات ٢٠٢٠ وساعتها هتبقى كارثة على كل الوكلاء فى حالة نجاح الحملة
١١- العناية مش محتاجة اكتر من شوية صبر وبس
١٢- مراسلات كتير جدا وصلت الشركات الأم ودا عامل مشكلة كبيرة لكل الوكلاء
١٣- سوق الكورى فى حالة رعب بكل توكيلاته
١٤- سوق المستعمل حاله واقف بسبب حالة الترصد
١٥- الحملة ناجحة بسبب ٣ حاجات رئيسية اولهم الزيرو جمارك والتانية هى السيارات الهيبرد واخيرا ان الحالة الشرائية العامة فى البلد منخفضة على كل المستويات
...
الخلاصة : الحملة ناجحة بكل المقاييس وسلاحها بسيط اوى ، الصبر
#خليها_تصدى