طبعا انا لا اقصد ولكني اقصد اساتذة الجامعات المصرية الفشلة الي بيدخلوا اولادهم وراثة في الجامعات واغلبهم لا يستحق اصلا......
👈البوست دة ممنوع للناس مرضى الضغط والقولون العصبى والحوامل ومرضى القلب وكبار السن واى تشابه بينه و بين الواقع فهو اغرب من الخيال 🙂
دكتورة هدي المراغي... دكتور وجيه المراغي ❤
هما مش اخوات بس الدكتورة هدى خدت لقب زوجها الدكتور وجية
الاتنين درسوا هندسة... وخلصوا وطلعوا يكملوا دراستهم في كندا علشان يستفيدوا ويرجعوا يفيدوا بلدهم
وجيه المراغي راح اخد ماجستير بتاعه في تصميم القطار السريع الكندي وفعلا تم استخدام كل دراساته تم تنفيذ القطار عقبال قطارات سكك حديد مصر كدة يا رب 🙂
الدكتوراه بتاعته بقى كانت القطار اللي بدورين وما شاء الله لحد النهاردة قطارات الدكتور وجيه بتجري في كل مكان في كندا زي الفل الحمدلله ..
الدكتورة هدي بقى راحت عملت الدكتوراه بتاعتها هي كمان في كندا برضه
وبعدين رجعوا مصر بقى !! خلي بالك الاثنين رجعوا مصر تمام ؟!
قابلهم الدكتور الباشا اللي في الجامعة وقالهم لا لا لا ... دكتوراه ايه وبتنجان ايه كندا مين ؟؟
لازم تنزلوا درجة علمية " يشتغلو بالماجستير يعنى " عشان سافرتوا وسبتوا البلد وعشان تبقوا من مستوانا العلمي المصرى المتقدم العظيم الخارج عن التصنيف 😀
طبعا هما حاولوا يفهموا الدكتور انهم راحوا يتعلموا فى اكبر جامعات فى العالم وراجعين بعلم يفيد مصربجد ... انما الفازلين كان مليّس على راسه مبهدله 😀
فراح طاصصهم الجملة الأشهر في تاريخ البيروقراطية المصرية
"اللايحة لا تسمح" هي فعلا لا تسمح ان ناس عظيمة زى كدة يفكروا انهم يرجعو مصر يا دكتور ❤
دكتور وجيه كان هيقوله ياللا يا ابن اللايحة بس قصر الشر واستعوض ربنا ولم هدومه هو ومراته وطلعوا على كندا تاني .. معلش يا دكتور انت الغلطان بردة 🙂
حط راسه في الشغل والابحاث بقى لحد ما تم اختياره واحد من أهم ١٠ اساتذة هندسة صناعية في العالم اه والله فى العالم مش فى كندا بس عارف بيشتغل اية تحديداً ؟
ابدا بيصمم مصانع... مصانع تمور وبلح زي اللي عندنا دي هنا ؟ 😂😂
لالا ... كندا مافيهاش بلح... انما فيها شركة زي كرايسلر بتاعة العربيات مثلا... الشركة دي بتستشيره في تطوير مصانعها ولما بيكون عندهم مشكلة بيكلموه 🙂
اعرف ناس وانا واحد منهم والفنان محمد رمضان حلمهم فى الحياة يركبوا العربية دى بس الفرق ان محمد رمضان اشتراها وانا لسة 😂
طب والدكتورة هدى؟ قعدت تربي العيال؟ وتفرغت لعمايل المحشي؟
لا... كندا مفيهاش محشي برضه 😂
الدكتورة هدى بقت " اول امرأة تحصل على الأستاذية في الهندسة الصناعية في تاريخ كندا واول سيدة في تاريخ كندا عميد لكلية الهندسة "
اه وربنا زي ما بقولك كدة... بقوا "بيدرّسوها " هي شخصيا لانها تم تصنيفها من افضل نساء كندا في التاريخ في منهج المدارس هناك كواحدة من أهم النساء في تاريخ كندا !!
طب والمحشي؟؟!!! 😂😂 ما قولنا كندا مفهاش محشى 😂
كمان بقت أول إمرأة مستشار لوزير الدفاع الكندي !!
اول امرأة يتم انتخابها كزميلة في الاكاديمية الدولية لبحوث الانتاج في باريس!
اسست مركز نظم التصنيع الآلي في جامعة ويندسور!
بقت بتدي استشارات وتم تعينها مستشارة في بناء مصانع فورد للانتاج الآلي بتاعة العربيات هما تقريبا اصبحوا تخصص عربيات 😀 علشان استعانت بها شركة كرايسلر للسيارات في تحديث مصانعها !!
وانجازات تانية كتير عاوزه 100 بوست تانيين 😀
واضح ان المحشي مالوش عيش في كندا 😂
انا مش قادر اتخيل دكتورة هدى دلوقتى لو كان الدكتور وافق على تعينها فى الجامعه فى مصر وشكلها وهي بتعلم الشيتات وبترميها فى وش العيال فى المدرج وبتقولهم اللى مشتراش الكتاب هيشيل المادة وادى دقنى لو حد نجح 😂
بالنسبة للصوره اللطيفة دي من ايام قليلة ودي في زيارتهم للاقصر مع اولادهم واحفادهم
هما كانوا ممكن يسافروا اي مكان تاني يتفسحوا على فكرة اظن مش محتاجة مناقشة و افضل اماكن في الكوكب بيتمنوا الناس دى تفكر انهم يزوروها 😉
طب انت سمعت عنهم ؟ لا
طب اتعملهم تأمين وحراسة وشو زى ميسى ؟ طبعا لا
الخ الخ ..
تخيل بعد اللي حصلهم من مصر... برضوا اختاروا مصر عشان يقضوا فيها "اجمل اوقاتهم" زي ما قالوا !!
وكمان زارو مستشفى سرطان الاقصر اللي بتتبني و قرروا يساعدوا ويساهموا كمان فيها 🙂
دي عينة المصريين اللي موجودة في مشارق الارض ومغاربها 🙂
#اللي_مش_عاجبه_يروح_كندا
سمير نصار
#الإعلامية_أمل_خليل
ليست هناك تعليقات:
إرسال تعليق