كلام في الحب منقولة

عن الحب
سمعت وقريت كتير عن الحب و أنواعه و أوجاعه بس في حاجات عن الحب احنا مش مدينها حقها
زي ان الحب ما بيجيش مع الوقت الحب بيكون جوانا و بيطلع في اللحظة المناسبه اللي بنلاقي فيها الشخص صاحب الحب ده و اللي موجود جوانا علشانه  ، مافيش حب بيتصنع ، علشان كده مافيش حاجة اسمها الحب بيجي بالعشرة احنا مش بنحب الشخص اللي معانا في العشرة دي انما بنحب الحالة اللي اتحطينا فيها وقدرنا نكيفها علشان ترضي الطرفين اللي في العشرة
.........:
من حوالي ٣ سنين دخلوا شقة لقوا راجل اسمه استاذ رأفت تقريبا نايم في حضن مراته اللي ليها ٣ أسابيع متوفيه بس الاستاذ رأفت مكنش نايم الاستاذ رأفت فضلت حاضنها من وقت ما ماتت لحد ما مات هو كمان في حضنها
و لما سألو الجيران عنهم قالوا ان ليهم اكتر من ٤٠ سنة متجوزين و ما خلفوش بس معروف في المنطقة ان الاستاذ رافت بيحب مراته و مقدرش يتجوز عليها او يطلقها
فضلوا مع بعض و ماتوا في حضن بعض 
................
في شغلي بحب اكون مع الموهبين مش المحترفين لان الموهوب بيعمل شغله بحب فبيطلع بحب للناس و مابعوفش يعمل شغل اي كلام ، على العكس من المحترف اللي بيعمل شغل نضيف يعجب الناس و يقدر يعمل شغل اي كلام لانه مش بيعمل ده بحب هو بيعمله علشان هو شاطر فيه زي الموظف المجتهد و الموظف المبدع فرق كبير
.........................
كنت راكب في الكرسي الاخير في الميكروباص جنب الشباك و على الشباك التاني بنت صغيرة مطلعه راسها من الشباك و مشبكة ايديها زي ما تكون بتصلي بس هي فعلا كانت بتصلي و المطر مغرق وشها بس هي كانت بتمتم وهي مبسوطة  و ابتسامتها و هي باصة للسما فيها حب كبير حب للمطر حب لحبيبها حب لربنا مش عارف بس تقريبا المطر كان حاسس بيها و بيمشي على وشها بشويش زي ما يكون بيحسس عليها
بعدها بكام يوم الدنيا مطرت تاني و كنت في الميكروباص جنب السواق ببص على الميكروباص اللي ماشي قدامنا لقيت ست كبيرة لابسه خمار و طالعة برأسها و المطر نازل على دمغها زي الدش و هي فاردة ايديها بتلمس المطر شوفت على وشها ضحكة عمري ما أنساها ضحكة طفلة صغيرة باباها جابلها عروسة هدية
المطر هو الحاجة الوحيدة اللي شفتها بتفرح المصريين حتى العيال البلطجية اللي بيقفوا على النواصي بينسوا البلطجة و يقفوا يلعبوا تحت المطر
حب المطر هى الحب اللي بيرسم ضحكة على وش الكل كبير صغير اعتقد ان الشياطين  نفسهم  بيحبوا المطر
................
الاستاذ احمد ذكي او زكي قال في فيلم ( البيضة و الحجر ) لمعالي زايد كل شئ بيتولد صغير و يكبر الا الحزن بيتولد كبير و يصغر
في الحقيقة هو نسي يقول ان الحب بيتولد كبير و بيعيش كبير و بيفضل كبير  اللي يحب ماينفعش يتبدل حبه لكره مستحيل اللي بيحب بيكمل للاخر ما بيتراجعش اعرف واحد أتقدم لواحده ٦ مرات لحد ما اَهلها زهقوا و وافقوا ده شخص بيحب
لما تحبوا ماتزهقوش من مطاردة الي بتحبوهم لازم توصلولهم حبكم لازم على الاقل يعرفوا انكم بتحبوهم
كونكم تتجوزوا بقى او ماتتجوزش ده اسمه ( النصيب ) مش الحب
بس عيب عليك تعيش و تموت من غير اللي بتحبه ما يعرف انك بتحبه
وزي ما قالت الست ( الحب من غير أمل أسمى معاني الوجود )
................
الحب انواع وقصص
في قريتي على ايامنا كان الشاب اللي بيروح ثانوية عامة الناس بتقوله يا استاذ وبيحترموه على اساس انه امل البلد في المستقبل وهينفعهم .. والناس بتيجي تحكيله وتشكيله بما انه مثقف القرية
فى مرة شاب جاني يحكيلي مشكلته انه بيحب بنت الجيران قووووي وبما اننا في الصعيد فمينفعش يعاكس ولا يقولها مصيبة كبرى المهم انه فضل يحكيلي عليها ايام كتير ويعيط وقالي تعبير انا عمري ما نسيته قالي
( انا بحبها حتى لو اتكب على وشها ميه نار وما بقيتش جميلة زي كده )
ضحكت وقتها في سري وقولت ده اكيد اهبل ومع الوقت ولما كبرت وقريت وفهمت وسمعت وشوفت وجربت افتكرت كلمته وعرفت وقتها ان ده هو الحب الحقيقي اللي بيكون خالي من الشهوات حب من اجل الحب .. حب الروح التعبير كان بسيط بحكم بساطه صاحبه لكن كبير لليفهم ويحس المهم بقى فتوكوا في الكلام
.................
قبل ٤٥٠٠ سنة كان في و احد شغال زي اسامة منير اسمه ( بتاح حتب ) كان حكيم مصري بيكتب مواعظ عن الحب وحكم 
عمنا بتاح كتب وقال
إذا أردت الحكمة فأحب شريكة حياتك ، أعتن بها ترعى"
بيتك ، قربها من قلبك فقد جعلها الإله توأماً لحياتك ، زودها بكسوتها ووسائل زينتها وزهورها المفضلة ، وعطرها المفضل ، كل ذلك سينعكس على بيتك و يعطر حياتك و يضيئها .
اعمل على سعادتها ففي سعادتها سعادتك و سعادة قلبك وحافظ عليها ما دمت حياً ، لن تحافظ عليها بالقسوة و الطغيان بل ستأسرها بالحنان فالمعاملة الحسنة تفعل أكثر من القوة .
حس بآلامها قبل أن تتألم و بجوعها قبل أن تجوع ، إنها تعيش في أنفاسك و في نظرك و في جسدك إنها أم أولادك ، إذا أسعدتها أسعدتهم و في رعايتها رعايتهم"
#المهم
واحد من بتوع الاثار قالي ان بتاح كان بيكتب مواعظ الحب دي للست الوحيدة اللي كان بيعشقها و كانت بتستخدم الحكم بتاعته في انها تدور على شريك حياتها اللي مش لقياه وكل مرة كانت بتفشل علشان بتختار غلط
عمنا بتاح اتجوز واحده بتحبه و هو كمان حبها بس ماقدرتش تخليه ينسى عشقه و اللي فضل يساعدها علشان تلاقي حبيبها رغم انها لو ركزت كانت هتعرف ان بتاح بيعشقها لحد العبادة.
وعلشان بتاح حبه كان اكبر من اي حب في الارض فضل يحبها في سره و يساعدها لانه كان شايف انه  كده كان بيساعدها علشان تكون سعيدة وسعادتها كانت اهم حاجة عنده اهم من انها تكون شريكة حياته و فضل بتاح على الحال ده لحد ما مات و هو بيعشقها و أتمنى انها تكون معاه في
الحياة الجديدة بعد ما يقوم من الموت
وده ينطبق عليه المثل اللي بيقول ( قليل الحظ يعضه الكلب في المولد )
...................
الصورة دي مالهاش علاقة بالبوست دول ٤ متر البتاع اللي بيطقطق سرقتهم من الشغل علشان بحبه
#حبوا_بعض