الجزاء من جنس العمل

#انت_استثنائي 

واحدة نزلت الصورة دي وقالت إنها كانت راكبة المترو والطفل ده كان واقف لابس شبشب ورجليه متعوره من المشي، شافته أم شابه معاها ٣ أطفال من بينهم ولدين سنهم قريب لسن الولد ده، الأُم سألت الولد "ليه مش لابس حاجة في رجلك؟" قال لها "معنديش"

قالت لإبنها "اقلع الكوتشي يا حبيبي إحنا بيتنا قريب وهو معندوش كوتشي" الولد قلع الكوتشي في لحظه وسابه للولد وسابوه ونزلوا، الولد من فرحته لبس الكوتشي بسرعة ووقف يبُص عليه وهو في رجله، أد إيه موقف عظيم وقرار بسرعة بديهة من ست بنت أصول، الأطفال دي أكيد شافت حنية وعارفة إنها هتتكافئ على الخير اللي هتعمله ده، اللي بيتزرع في الأطفال في السن ده هيفضلوا يعملوه طول العمر، من شب على شئٍ شاب عليه.

** المطربة ياسمينا سامي من مُدة كانت كاتبة إنها سمعت في برنامج لـ مصطفى حسني حاجه وفضلت ثابته في دماغها وعجبني الكلام جداً 

كان بيقول: لما تكون بتطلع صدقه متعود تطلع ١٠ او ٥ جنيه مثلا جرب مره تطلع مبلغ كبير شويه لحد واحد يعني مثلا ٢٠٠ او ٤٠٠ جنيه مثلا إديهم لحد محتاج.. ربنا بيرد الشهقه ب شهقه( هو قال كدا حرفياً )... يعني إيه؟؟؟ يقصد الشهقه يعني صوت المفاجأه.. على أساس إن مبلغ الصدقه غير متوقع للشخص... هو شهقته كانت ب ٢٠٠ أو ٤٠٠ جنيه إنما إنت شهقتك ب كام؟؟؟؟

شغلانه حلوة بمبلغ حلو؟ دعوه غاليه أوي نفسك تتحقق؟ زواج؟ مولود؟ صحه وعافيه؟ سعه في الرزق وتوفيق في حياتك؟؟ جُبران خاطرك وراحتك النفسيه؟؟

شوف بقى شهقتك تتحقق بإيه؟؟

** من فترة حد أعرفه معرفة شخصية طلع زكاة وصدقات في رمضان لكل اللي يعرفهم وكان باقي معاه مبلغ حوالي ٦ آلاف جنيه، كان شايل هم "هيديهم لمين يستحق؟!" اليوم اللي قرر فيه يطلع الزكاة كانت عربيته عطلانة وكان عنده مشوار لـ ٦ أكتوبر وكل ما يشاور لتاكسي يقول له ٦ أكتوبر يسيبه ويمشي لبُعد المسافة، في الأثناء دي كان في شاب واقف وراه بيتكلم في التليفون وبيقول لواحدة "طب أنا هعمل إيه طيب، ما تضايقيش نفسك طيب سيبيها على الله هيدبرها"، كانوا في أول اليوم لسَّه، صديقي لقى الشاب ده بيخبط على كتفه وبيقول له "انت عايز تروح فين؟" قال له "٦ أكتوبر"، قال له "تعالى هوصلك"، قال له "هتوصلني ازاي؟"، شاور له على عربية تاكسي قديمة وقال له "معايا عربية على أد حالها مش أد المقام"، قال له "لأ دي زي الفل يلا بينا"

وفعلاً راح معاه وصديقي قال له "أنا هعمل كام مشوار" قال له "هستناك كده كده اليوم مضروب"، وفعلاً استناه وراح معاه كذا مشوار ولما خلص قال له بالحرف "والله يا أستاذ العداد عامل مبلغ كبير ٣٥٠ جنيه"، رد قال له "٣٥٠ ج ليه كده كتير"، رد قال له "خلاص بُص نقسم البلد بلدين أنا هاخد ٢٥٠ ومسامحك في الباقي وربنا يرزقني بيهم"، قال له "أنا كنت سامعك وانت واقف بتكلم واحدة ومتضايق"، قال له "والله يا أستاذ دي مراتي وعمالة بتقول لي عايزة أجيب للعيال هدوم العيد وأجيب حاجات للبيت، وأنا زي ما انت شايف أرزاقي على باب الله"، راح مطلع الـ ٦٠٠٠ جنيه وإداهم له وقال له هات لعيالك اللي نفسهم فيه وروح قول له ربنا راضاني الراجل شهق من الفرحة وفضل يعيط وهو مش مصدق ويدعي لصديقي والدموع نازلة منه.

سيدنا النبي قال "لو أنكم تتوكلون على الله حق توكُله، لرزقكم كما يرزقُ الطير، تغدو خماصاً وتعودُ بِطاناً

مهما بلغ بيك الضيق والكرب والظلم تأكد إن ربنا سبحانه وتعالى قادر يغير ده في غمضة عين، إنه الكريم العظيم الذي إذا أعطى أدهشك بعطائه

أعملوا خير وإجبروا الخواطر دي أعظم حاجة في الدنيا  

هو عندكم هين ولكنه لو تعلمون عند الله عظيم 

صدق المصطفى "صلى الله عليه وسلم"

الخيرُ في أُمتي إلى يوم الدين ♥️

منقول