بعد الثلاثين

بعد منتصف التلاتين .. 

بعد ما حبيت قوي وصاحبت جدا ومعرفتش اكره ... بعد ما حزنت بحرقه وضحكت بهستيريا

بعد ما اتزنقت في الفلوس .. وبعزقتها

بعد ماوافقت بضعف ورفضت بقسوه

بعد ما اتنصفت واتغريت .. واتظلمت ولبست فالحيط

بعد منتصف التلاتين..

اكتشفت ان السعاده موجوده في الحاجات العاديه

الابتسامه.. والهدوء .. النوم بدري.. ونسيم الفجر .. وصوت الراديو

بعد منتصف التلاتين..

اكتشفت السعاده موجوده في العلاقات العاديه. الخروجات العاديه.. مع الناس العاديين اللي بحس معاهم باحاسيس عاديه..وكلامنا مع بعض بيبقى عادي .. لا متزوق ولا فيه وعود ناريه وتصريحات عنتريه

بعد منتصف التلاتين..

مابقتش بنبهر بالناس الوااااو

انا كمان بطلت احاول اكون سوبر وااااو

ارتحت جدا لما اتصالحت مع فكرة اني شخص عادي و زميل عادي .. و صاحب عادي

بعد منتصف التلاتين..

 في حروب كتير بيني وبين نفسي انتهت لما اتفقت معاها اني مش لازم اكون الاول ولا الاشيك ولا الاهم ولا الاظرف ..

علي ابواب الاربعين 

اقتنعت ان اكبر نعم ربنا على الانسان انه يعيش حياه عاديه هاديه ومستقره 

بعد منتصف التلاتين..

بقيت عادي لدرجة ان مش ممكن حد يلاحظ حضوري إلا لو كان عنده بصيره غير عاديه..

#منقول