واحده حطاها على جروب ولقيت كل البنات بيقولو ولها مامتك مثقفه انا كنت شفتها في فيلم اجنبي قبل كده.. بس انا اضفتلها انه لازم مامتها تحط توم بردو في بقيت الاركان تحسبا بردو للفامبيرز محدش عارف 😂😂😂
معلومات سريعة عن الكورونا لاحظت ان فيه ناس كتير موصلتهاش المعلومة :
" المعلومات كلها مؤكدة من منظمة الصحة العالمية وعلى موقعهم الرسمى " :
1 - الكحول ما بيتحطش على الوش ... لا تمسح بيه وشك ولا تتمضمض بيه ولا تدخله مناخيرك.
2 - الجوانتيات مابتتلبسش فى الاماكن العامة وتقضى بيها مشاوير.... الايدين أفضل وتغسلهم كل شوية.
3 - الماسك بيستعمل مرة واحدة فقط ويترمى .. مابيتغسلش ولا بيتعقم ... وما تسألش ليه .. فيه حاجات كده مينفعش تسألها عشان مش هنخلص زى مثلا ليه مابنحلش المضاد الحيوى بمية سلطة بدل المحلول اللى بيجى مع الدوا ... هو كده والعلماء اخترعوا أمه كده.
4 - الماسك يترمى فى كيسة سودة جوه سلة مقفولة ...ما ترمهوش ع الارض أو هرمونات الحنية تزيد عندك فـتطبقه وتحطه فى المحفظة وتقول هسيبه ذكرى عشان افتكر الايام دى .. كده أنت اللى هتبقى ذكرى والماسك هو اللى هيفتكرك.
5 - اللبس بيتغسل ازاى ؟ طبقا لمنظمة الصحة العالمية بيتم تنظيف الملابس المتسخة المشكوك فيها عن طريق غسلها في الغسالة بمسحوق الغسيل وماء دافئ (درجة حرارته تتراوح بين 60 و90 درجة مئوية).
6 - طب فيه قميص أبيض بس فيه أجزاء ملونة أغسله مع الابيض ولا الالوان؟ ... معرفش طبعا ومش موضوعنا.
7 - فترة حضانة المرض فى الجسم مدتها من (يوم واحد) لـحد (14 يوم) ... يعنى ممكن يبقى عندك كورونا وانت مش عارف ..خلى بالك.
8 - مفيش علاج تم أكتشافه للكورونا لحد دلوقتى ... عشان الناس اللى بتصحى من النوم والتفاؤل حازقها اوى وتقوم كاتبة "عاجل تم اكتشاف علاج للكورونا ".. كل ده هرى ... العلماء لسة عمالة تجرب أدوية معمولة لامراض تانية اصلا .. وكلها تجارب ممكن تنجح مع ناس وناس لأ .. وممكن تضر...فأياك تاخد علاج من نفسك بناءاً على بوست!
9 - مفيش بردو وصفة بتعالج الكورونا زى الحاجات الخزعبلية اللى بشوفها فى الجروبات ... يعنى فيه واحدة كانت كاتبة إن التوم المجروش مع عيدان الملوخية ومحطوط عليهم سمسم وجنزبيل ومضروبين فى الخلاط ده بــ يقى من الكورونا !!!!! ... طبعا ده اسمه براز بط مش وصفة أبدا... ما تاكلوا السمسم لوحده .. وتاكلوا التوم لوحده و تاكلوا أم الملوخية لوحدها أو بالارانب .. انتو بتكبروا المواضيع ليه وتعملو حوارات ووصفات ملهاش ستين لازمة!
10 - فيه بوست تانى منتشر إن مية القلل بتقى من الكورونا ... انا عايز أعرف بجد انتو بيخطر على بالكو المعلومات دى ازاى ! ...ايه علاقة القلة بالكورونا !! 🤔
11 - إن شاء الله خير بس كل اللى فات ده مش هيقضى على الكورونا .. قعدة البيت بس هي اللى ممكن تنهى الازمة.. فلو سمحت أقعد فى البيت.
ليست هناك تعليقات:
إرسال تعليق