شرح تفسير القرآن الكريم للثقب الاسود من صديقنا مصطفي اسكندر منقولة

اخواننا اللي شايفين ان اينشتاين ماقالش حاجة جديدة عشان كل حاجة مذكورة في القرءان 
وأخواننا اللي شايفين ان القرءان ماقالش حاجة جديدة عشان الدين مافيهوش فيزيا
تعالوا نصالحكو على بعض، بس اربطوا الحزام عشان هانسافر بعيد

(لو مش عايز تسافر معانا، إبدأ من الجزء الأخير <<<<8 حقائق>>>>)

هل القرءان اتكلم فعلا عن الثقوب السوداء ؟

اللي إحنا متأكدين منه إن ربنا قال في سورة التكوير "فلا أقسم بالخُنَّس، الجَوارِ الكُنَّس".
الكلام ده معناه ايه؟!
مانعرفش سيادتك، بجد والله مانعرفش. الصحابة احتاروا في الآية دي من ١٤٠٠ سنة واحنا لسه بنتخانق عليها النهاردة أهو، تقدروا تدوروا في التفاسير وتشوفوا الخلافات اللي حصلت عليها، بس في النهاية اجمعت كل التفاسير المنشورة على احتمالين:
- يا اما المقصود هي النجوم والكواكب، تخنس بالنهار (تختفي) و تجري بالليل في السما (جَوارِ)، ثم تكنس مرة اخرى (بمعنى تعود الى مخبأها تحت وهج النهار).
- يا اما يقصد بيها البقر الوحشي، يخنس في مخبئه، ويجري في مرعاه، ثم يكنس مرة اخرى إلى مخبئه.
هكذا فسرها العرب ولاشيئ اخر.

فا الخبر الوحش، ان ماعندناش شاهد بيقول ان الاية دي معناها الثقوب السوداء، الرسول نفسه ماقالش كده من قريب او من بعيد.
بس الخبر المهم، انك لو قريت الآية في ضوء السورة كاملة، هاتفتح على نفسك باب مش هايتقفل طول العمر.
اللي هاتقراه دلوقتي هايعلق ف دماغك للأبد
————————————————————

الفصل التامن من كتاب Brief History of Time بيتساءل كيف سينتهي الكون، في علم كامل اسمه Physical Cosmology بيحاول يفهم كيف ستكون النهاية، سورة التكوير قدمت إجابة تصويرية للنهاية، حتى ان الرسول قالنا اللي عايز يشوف النهاية بعينيه يقرا التكوير: "من سرّهُ أن ينظُر إلى يوم القيامة كأنّهُ رأيُ العين فليقرأ إذا الشّمسُ كُوّرت"
يعني الآية اللي احنا مش فاهمينها دي واقعة ف سورة بتوصف نهاية الكون اصلا!

طب هيا ال Physical Cosmology دي قالت ان الكون هاينتهي ازاي يعني؟
قالت 3 نظريات، منهم نظرية (الإنسحاق الكبير) اللي بتقول إنه بعد الانفجار العظيم فضلت قوى التمدد تبعد الكون عن بعضه وفضلت قوى الجاذبية تحاول تلمنا تاني. لحد ما هانوصل لنقطة سيتوقف عندها تمدد الكون وتنتصر الجاذبية.
فا هايبدأ الكون في الانكماش مرة اخرى، وتتصادم المجرات والكواكب، وهانتحشر كلنا في مساحة تتقلص وهاتتمسح النجوم من السما، حتى تبتلع الثقوب السوداء كل شيئ ~ Big Crunch Theory

طب هوا ربنا استخدم كل الأهوال دي في سورة التكوير عشان يقوللنا ايه؟ ايه موضوع السورة اساسا؟
استفتح الله السورة بأهوال نهاية الكون ليقسم لنا ان رحلة الاسراء والمعراج حقيقة و إن الرسول مش مجنون، اسلوب مش بتشوفه كتير في المصحف
المرة التانية اللي ربنا خاطبنا بنفس الاسلوب كان برضه بيكلمنا عن رحلة الاسراء والمعراج، وأقسم علينا بظاهرة فيزيائية أخرى. اقرا معايا كده:
وَالنَّجْمِ إِذَا هَوَىٰ، مَا ضَلَّ صَاحِبُكُمْ وَمَا غَوَىٰ، وَمَا يَنطِقُ عَنِ الْهَوَىٰ،....، مَا كَذَبَ الْفُؤَادُ مَا رَأَىٰ، أَفَتُمَارُونَهُ عَلَىٰ مَا يَرَىٰ؟؟،....، مَا زَاغَ الْبَصَرُ وَمَا طَغَى، لَقَدْ رَأَى مِنْ آيَاتِ رَبِّهِ الْكُبْرَى.

لو دماغك شغالة هاتديك سؤالين دلوقتي:
1. يعني إيه النجم اذا هوى؟ هوا في نجوم بتقع؟ تقع فين يعني؟
شوف، لو سألت قبل ١٠ ابريل ٢٠١٩ هانقوللك مانعرفش،
بس لو سألت بعد ١٠ ابريل هانقوللك كلنا ايوة النجوم بتهوي لما بتقع ف الثقوب السوداء. وصورناها وممكن ناخدلك سيلفي النجم وهوا بيهوى، دي مش نظرية

2. طيب ليه لما ربنا بيكلمنا عن الاسراء والمعراج في القرءان بيقسم بحاجات ليها علاقة الثقوب السوداء؟ إيه العلاقة بين الاسراء والمعراج والثقوب السوداء؟
الله اعلم،
بس تعالى نراجع معلوماتنا كده:
الاسراء والمعراج كما نعرفهما رحلتين، او تلاتة ربما!!
- رحلة ارضية في أبعاد الطول والعرض من المسجد الحرام إلى المسجد الاقصى
- ثم رحلة في البعد الثالث الإرتفاع من المسجد الاقصى الى السماء الاولى (نهاية الكون المنظور) ثم النفاذ الى سماء بعد سماء حتى اقرب نقطة من الله،
- يتخلل المعراج "رحلة جانبية"، لما جبريل خد الرسول و ذهب به الى الجنة والنار و شاف ١٤ صنف من ناس دخلت النار وبتتعذب ورجع الرسول حكى لنا عن أحوالهم هناك (راجع أحاديث المعراج)

طب بص حواليك كده. احنا ف ٢٠١٩ اهو، القيامة قامت؟ لأ،
حد دخل الجنة او النار؟ لأ،
طب حد هايدخلهم أصلا قبل يوم الحساب؟ برضه لأ
أمال الرسول راح لفين عشان يشوف الناس بعد يوم القيامة؟
أو بمعنى ادق، راح لإمتى؟
هل القيامة قائمة في المستقبل ونحن ننظر الى حياتنا الآن وبنندم على اختياراتنا الغبية زي "كوبر" في "انترستيللر"
(ده لينك المشهد لو ماتعرفوش) https://youtu.be/1yz_HurD0Io

انا كل ده ما قولتش حاجة فعليا، حاسبني على اللي جاي بقى
————————————————————
تنويه: كل المعلومات الواردة أدناه ليست أرائي الشخصية، انا ناقل للعلم من مصادره مش مألفه بنفسي، لو في سطر من ال 8 الجايين شايف انه مش حقيقي، شاورلي عليه وهاشارك معاك مصدره. انت اللي هاتبني الاستنتاج مش انا.

<<<<8 حقائق>>>>

1. بدأ الله بنهاية الكون (في الثقوب السوداء)، ليخبرنا ان رحلة الاسراء والمعراج حدثت، وان الرسول ليس بمجنون ~سورة التكوير
2. ثم اقسم الله بسقوط النجوم (في الثقوب السوداء) ان رحلة الاسراء والمعراج حدثت وان الرسول ماضل ولاغوى وماكذب الفؤاد مارأى ومازاغ البصر وماطغى ~سورة النجم
3. عاد الرسول من تلك الرحلة ليخبرنا عن ماسيحدث في المستقبل ~أحاديث المعراج
4. السفر في الزمان ممكن، لو سافرت في المكان ب ٩٩٪؜ من سرعة الضوء، "كل ماتحتاجه هوا صاروخ سريع جدا" ~ ستيفن هوكينج من مقالة (كيف تبني آلة زمن)
5. مسافة الكون المنظور ٩٣ مليار سنة ضوئية، الرسول سافر ال ٧ اكوان في ليلة، فا أيوة ده space-time travel وتقولها في عين التخين
6. الولوج من سماء لسماء يحتاج النفاذ خلال اقطار السماوات، وده بلفظ القرءان ~ سورة الرحمن
7. الخروج من كون ل كون يحتاج ممر دودي، ثقب اسود في أوله و ثقب ابيض في آخره، الثقب الابيض هوا مضاد الثقب الاسود، وهو يطرد المادة من قلبه إلى كون جديد ~ Einstein–Rosen bridge
8. لما ذكر الله لنا تلك الرحلة في السماء والزمن، اقسم بما يبدو انها الثقوب السوداء، او بداية ممر دودي تهوى فيه النجوم

خلاص كده؟هل ده معناه ان الفيزياء فسرت الاسراء والمعراج؟ والرسول انتقل عبر السماوات من ثقوب سوداء هي اقطار السماوات والارض؟
لأبرضه ، احنا مانقدرش نجزم، واللي يسألك قول له الله اعلم، ممكن تكون ببساطة معجزة حدثت بدون اي قيود فيزيائية لعالمنا.الأصل في المعجزة انها خرق لقوانين الكون.
الفيزياء فقط تخبرنا ان الرحلة دي ليست مستحيلة تماما، قد تكون ممكنة نظريا، بأدوات وتكنولوجيا عمرنا ما هانوصللها، المعجزة هاتفضل معجزة في النهاية، عمرنا ما هايكون عندنا براق وجبريل
ما أتمسك به، واتحاسب عليه قدام ربنا، اني اعتقد ان الاسراء والمعراج كانت رحلة في المكان والزمان.رحلة كاملة في كل الأبعاد الأربعة.الانتقال في مساحات لانهائية والعودة في دقائق ده Space-Time Travel

هل فعلها محمد حقا؟
كفار قريش سألوا نفس السؤال ده 😂، حتى انهم طلبوا من النبي ان يصف المسجد الاقصى وكانوا يعلمون انه لم يرتحل إليه من قبل، فوصف لهم المكان والمسجد وحتى حلقة الباب بدقة، وزادهم انه أخبر عن قافلة رآها في الإسراء تذهب من القدس لمكة، وصفها لهم بالتفصيل قبل ان تدخل مكة، فأقبلت عليهم كما وصفها. ده كده تاريخ مش دين.

نهاية الرحلة:
عاد الرسول من السماء لنا بطريقة، إسمها الصِلة، أو الصلاة، تجعلنا نحن نقوم بالرحلة من الأرض إلى الله في كل يوم. أخبرنا انها عمود الدين والعهد والميثاق بيننا وبينه، وصانا بها قبل أن يموت،، وشدد على ان نحافظ عليها ولا نتركها حتى نموت .نرتحل مع كل سجدة. سبحان ربي الأعلي، سبحان ربي الاعلى، سبحان ربي الاعلى

قُلْ آمِنُواْ بِهِ أَوْ لاَ تُؤْمِنُواْ إِنَّ الَّذِينَ أُوتُواْ الْعِلْمَ مِن قَبْلِهِ إِذَا يُتْلَى عَلَيْهِمْ يَخِرُّونَ لِلأَذْقَانِ سُجَّدًا ~ سورة الإسراء

نهاية الحلقة التانية 
—————————————
الحلقة الأولى
‏https://www.facebook.com/665061860/posts/10155985137236861?sfns=mo

الواجب المدرسي:
- راجع سورة التكوير، سورة النجم
- دور على نظريات الانفجار العظيم و الانسحاق العظيم
- سورة الأنبياء الآية ٣٠، سورة الأنبياء برضه الآية ١٠٤
- إقرا احوال اهل النار في أحاديث المعراج https://bit.ly/2Gwejc4
- الفيلم الوثائقي The Science Behind Interstellar
اختار الترجمة عربي https://youtu.be/F7Hh4cMQbGE
- وبصراحة افلام "Interstellar” و "Contact” لازم يتشافوا
Brief History of Time لو انت أسد اقرا-
تاج صحابك اللي هاتعمل الواجب معاهم 👩‍🚀