-تاني فرضية بتشرح نظرية الأكوان المتوازية هيا نظرية الأوتار واللي جت بكلام هد كل معرفتنا عن اصغر شئ ف الذرة اللي كونا فاكرينه "الكواركات" ...لأنها استبدلت الكلام دا وقالت ان اصغر شئ ف الذرة هي شرايط من الطاقة رفيعة جدا وصغيرة جدا اسمها "الأوتار" ومن هنا جاءت نظرية الstring theory واللي حظت بتأييد 58% من الفيزيائيين ومنهم "ستيفن هوكينج"(لروحه السلام🌹❤️).... بجانب 13% بيرجحوا صوابها .
-النظرية بتقول انه علي حسب طريقة اهتزاز الوتر بيكون سلوك المادة ونوعها بيتحدد زي بالظبط "وتر العود" علي حسب طريقة ضربك ليه بتاخد نغمة معينة ذات تردد معين وبالتالي بتكون المقطوعات مختلفة عن بعضها علي حسب طريقة لعبك ع العود....
-بالتالي الترتيب هيكون كالتالي من الصغير للكبير..أوتار ثم كواركات ثم بروتونات ونيترونات ثم الذرات اللي منها بيتكون كل شئ.
-بس احنا عارفين اي بيأثر ع شكل وتر العود يعني انت اللي بتتحكم ف سمكه وطوله وخلافه لكن اي اللي بيأثر ع الأوتار فائقة الدقة تحت الكمية دي؟...المخرج الوحيد اللي لقاه الفيزيائيين عشان يحلوا السؤال دا هو افتراض 6 أبعاد بجانب الابعاد التلاتة اللي منهم بيتكون الكون بتاعنا"خد بالك انهم طنشوا البعد الرابع بتاع اينستاين اللي هو الزمن "
-بس هييجي ف بالك سؤال فين هم الأبعاد ال6 دول ازاي مش شايفنهم ولا بنتحرك داخلهم ؟.....الاجابة مقنعة لحد كبير وبتعمل اسقاطات خطيرة ع فهمنا لكتير من الحاجات هيسبك انت اللي تفكر فيها.
-قالك ان ال6ابعاد خارج مجال رؤيتنا زي بالظبط الأشعة التحت حمراء والفوق بنفسجة ما هما خارج نطاق العين البشرية فمش معني انك مش شايف الأشعة دي انها مش موجودة!
-تخيل كدا اننا ف كوننا ثلاثي الأبعاد دا وهاريين نفسنا استنتاجات ونظريات وفرضيات وبنقول اننا البشر مافيش زينا واستحالة تكون فيه كائنات تانية غيرنا ...والكائنات التانية عايشة ف كون رباعي الأبعاد مثلا وبتتفرج علينا وتضحك ع جهلنا وظننا اننا وحدنا عايشين ف الكون .....وهكذا كائنات تانية عايشة ف ابعاد أعلي بتضحك علي اللي بيضحكوا علينا .... وف الآخر يجيلك بربور بحر يقلك مافيش "اله" عشان هو خارج نطاق رؤيتي ومش عارف اختبر وجوده ف المعمل و لا ف الطبيعة حواليا عشان قلبي يطمن انه موجود!!!!..
-طب حطه-سبحانه- فرضية ضمن فرضايتك طيب؟ يقلك لأه ...طب حط احتمال وجود بنسبة 50% واحتمال عدم وجود بنسبة50% عشان تكون بتفكر بعقلانية يقلك لأه برضه!!!...كانت بركت عليك وهيا بتولدك ياشيخ.
-نيجي لتالت وآخر فرضية واللي اسمها the bubble universies...وأحسن مثال لفهم الفرضية دي هو:
-تخيل معايا صحراء كبيرة شاسعة وفيها حفرة صغيرة فيها مياه "بركة أو مستنقع يعني" وانت طاير فوقها بطيارة ومعاك كورة ورميتها عشان تجيبها ف الحفرة فأحتمال انك تجيبها ف الحفرة تقريبا 0%...
-لكن تخيل انك رميت آلاف أو حتي ملايين الكرات؟ فأحتمال كبير جدا كورة منهم تيجي ف الحفرة دي ....ولأن الحفرة فيها مياه والرطوبة فيها كويسة نمي علي الكورة شوية فطيرات وطحالب وبكتيريا وسألوا نفسهم سؤال ياتري فيه عالم تاني غير عالمنا دا؟ فردوا ع بعض وقالوا استحالة طبعا.....تخيل بئا لو شافوا كم الكور اللي حواليهم والحظ مكانش حليفهم بعد ما كانوا مصدقين ان مافيش الا كورة واحدة وحياة واحدة!.
-باسقاط التصور دا علينا فأحنا عبارة عن الطحالب والبكتيريا والفطريات دي وبنفس الطريقة اللي اتكون الكون بتاعنا بيها مليارات الأكوان التانية اتكونت..... لكن احنا موجودين ف الكون دا لأن الظروف اللي فيه مناسبة لحياتنا يعني مثلا الثوابت الكونية اللي عندنا زي سرعة الضوء وثابت بلانك لو حصل فيهم تغير صغير جدا المجرات والكواكب والشموس هتنهار علي بعضها ......وبالتالي أنت مش هتبقي موجود...
-بنفس الطريقة دي فالثوابت اللي ف كوننا دي موجودة ف الأكوان التانية لكن بقيم مختلفة يعني مثلا لو "باي"عندنا بتساوي 3.14 فهيا ف كون تاني هتكون بتساوي 6.14 مثلا وهتكون مناسبة ان حياة كاملة زي حياتنا تقوم عليه.
#العلم_أصله_كمتي
ليست هناك تعليقات:
إرسال تعليق