امبارح اتفرجت على ماتش الأهلي ومونتيري على قناة SSC وشوفت الإستديو التحليلي للمباراة وكان عفيفي واحد من محللي اللقاء تعالوا اقولكم قال ايه
في الأول بين الشوطين كان محور كلامه (شخصية الأهلي) القوية اللي أظهرها في غياب فريق كامل وقال فيما معناه إن الأهلي بيقدم شئ مش معقول
بعد الماتش انطلق عفيفي وبقى يعدد روعات الأهلي إللي وصلته إن يعمل إللي عمله ورجع أكد ع الشخصية وشرح إن ده مش بييجي بالصدفة وانها نتيجة (تراكمات )ومواقف و(تقاليد )مشهور بيها الأهلي
وكمل وقالك إن (جودة المدرب)كانت فارقة وإن موسيماني مدرب مميز عمل ماتش عمره وقدر يتحكم في الجيم
كمان اتكلم على (روح الأهلي ) والحماس إللي أظهره اللعيبة وربطه مع أجواء التشجيع
لكنه سأل سؤال وجاوب عليه وقال إزاي انت كنادي أهلي بتقدر تقنع اللاعب بتاعك إنه مايخافش رغم كل الظروف إللي بتقابله وشرح إن الأهلي عنده (تمرس) ع القصة دي و بيملك من ( التاريخ) والوقائع إللي يخليه دايماً قادر يقنع لعيبته بـ ده
بص بقى على كل إللي الكلام اللي بين قوسين وشوف العامود الفقري لوجهة نظر عفيفي وبنى كلامه على إيه
هتلاقيه بيعترف بشخصية الأهلي ويبرز التراكمات وبيأكد على تمرس الأهلي وإنه بيملك مدرب كبير صاحب جودة عالية ومع ده بيملك تاريخ وتقاليد وروح مقوياه في الملعب
طبعاً أنا ولا فارق معايا بيقول إيه ويفضل بالنسبة لي شخص يعاني من فساد المنطق بس عايز اهدي البوست ده لكل مشجع سلم عقله لعفيفي وأقنعه إن الأهلي بطل عشان موج البحر والسحاب وأوراق الشجر بيساعدوه
وقت الجد لما قعد قدام شاشة كبيرة وسط ناس بتفهم كورة ماكنش عنده حل غير إنه يقول إللي مايضحكش الناس عليه ويحترم عقولهم
ليست هناك تعليقات:
إرسال تعليق