حكاية عن الاسطورة أبو تريكة حبيب الملايين من الاسطورة بيبو حبيب الملايين

الخطيب كان بيحكي على موقف تريكة لما وصله عرض رسمي من الهلال السعودي في 2008 بمبلغ صعب لاعب كرة قدم يرفضه ، وقال لما خدنا دوري ابطال افريقيا 2008 وساعتها كنا رايحين كأس العالم للاندية في اليابان فأنا كنت رئيس البعثة فلقيت مسؤول من الهلال السعودي بيكلمني وقالي احنا عاوزين ابو تريكة وعرض مبلغ 5 مليون دولار تقريبًا ( متخيل الرقم ومتخيل حجم الرقم وقتها ! ) الخطيب بيقول انا رديت عليه وقولتله لما نوصل هاخد رأي الجهاز الفني واشوف رأي ابو تريكة ، وفعلًا لما وصلنا وعرضت على مانويل جوزيه العرض وقولتله تريكة جايله عرض بـ5 مليون دولار وهياخد مبلغ كبير ، قالي بصراحة انا موافق لان المبلغ كبير جدًا جدًا وانا موافق عشان مستقبل اللاعب نفسه ، بعدها قعدت مع ابو تريكة وعرضت عليه المبلغ المعروض من الهلال بس اتضحلي انهم كانوا اتكلموا معاه وهو كان متردد ، ساعتها قولتله خد راحتك ووقتك وقدامنا 3 ايام اقعد فكر براحتك ، ساعتها كنت كلمت الكابتن طارق سليم وحسن حمدي واتفقنا اننا نسيب القرار لـ ابو تريكة ، في بطولة كأس العالم للاندية عملنا بطولة مش مُوفقة وخدنا مركز مكنش كويس ، فاحنا في الفريق كنا عارفين ان الجمهور زعلان من مستوي الفريق فا واحنا راجعين مطار القاهرة لقينا جمهور كتير جدًا جاي يستقبلنا ، كنت قاعد في المطار انا والكابتن طارق سليم لقينا الجماهير بتهتف لـ تريكة " متسيبناش يا تريكة " تريكة في الموقف دا بكي فأنا روحتله وقولتله انا خلاص عرفت قرارك ، رد عليا وقالي فعلًا مش هقدر امشي وبعدها قالي الجمهور اللي يثق ويغني لينا واحنا خسرانين أغلي من كنوز الدنيا وفلوس الهلال.