الراي الاخر

ازاي الدول الرأسمالية بتحسب العائد على الإستثمار لمشاريع عملاقة زي المترو؟

طب انا عايز اقول كلمتين في موضوع المترو دة بما يرضي الله والرأسمالية... انا سمعت تصريحات للرئيس السيسي بيقول فيها انه عشان يعمل خطوط مترو جديدة هتتكلف 20 ولا 30 مليار وأنه بالتالي لازم أسعار التذاكر تبقى 3 أضعاف السعر وقت تصوير الفيديو  (كان 2 جنيه وقتها) و دة معناه أننا بنتكلم عن استرداد رأس المال من أرباح التذاكر.

المنطق دة هو منطق الشركات الخاصة مش منطق الدولة، لأن الشركات بتحط فلوس في مشروع وبتحسب زمن الاسترداد للفلوس دي والعائد على الإستثمار من المشروع نفسه فقط (عادة بتبقى مشاريع البنية الأساسية والمواصلات زمن الاسترداد بالنسبة للشركات اكتر من 15 سنة في الدول الي عندها اقتصاد حديث)... لكن بالنسبة للدول الرأسمالية و بحساب المكسب والخسارة فقط مش بحساب رفاهية المواطن وحقوقه حتى، الحسبة بتبقى مختلفة خالص عن حسبة الشركات وهاقولك ازاي.

العائد على الاستثمار بالنسبة للدول له اكتر من مكون:
1- عائد اقتصادي: مشاريع البنية الاساسية والمواصلات بتحقق رواج اقتصادي و سهولة في عمل الشركات القريبة من خطوط المواصلات وسهولة لوصول العمالة ليها من اماكن أبعد، وبالتالي بترفع الناتج القومي الإجمالي وبتقلل البطالة، وبتخفف الضغط على خطوط المواصلات والطرق الموجودة من الاول ودة معناه تكلفة نقل اقل بالنسبة للمواطنين و الشركات. كل دة بيرفع كفاءة الاقتصاد بشكل عام ودة بيترجم لحصيلة ضرايب اكبر ودة أهم واكتر من الي ممكن تحصله من فلوس التذاكر مباشرة.

2- عائد اجتماعي: بتقلل البطالة زي ما قلت وبتوزع فرص العمل على مناطق اوسع، ودة معناه تخفيف التوتر الإجتماعي والعنف والجريمة. وطبعا العائد الاجتماعي بيترجم لفلوس برضه بس بشكل غير مباشر زي خفض تكلفة حفظ الأمن العام وتقليل الحاجة لبرامج الدعم الاجتماعي.

3- عائد بيئي: مشروع زي مترو الأنفاق شغال بالكهرباء اكيد افضل للبيئة بكتير من النقل المعتمد على الوقود الحراري، وتحسين البيئة برضة ينفع تترجمه لفلوس بشكل غير مباشر، لأنه تدهور البيئة بيعني زيادة تكلفة الرعاية الصحية المجتمعية و بيأثر على أنشطة زي السياحة وقد يؤثر كمان على اسعار العقارات في المناطق الملوثة.

بالتالي مافيش حكومة بتحسب العائد على الاستثمار من اسعار التذاكر مباشرة و فقط، ولكن بتتحسب بالعوائد الاقتصادية والاجتماعية و البيئية + اسعار التذاكر. أما لو هتتحسب بالعائد المباشر فقط يبقى المنطقي انك تخصخص المرافق دي وتسيبها للي يعرف يديرها بكفاءة وأنت كحكومة تحصل منه ضرايب بس... او لأن إنجاز مشروع زي دة حتى لو الي نفذه قطاع خاص بيحقق عائد إقتصادي واجتماعي للدولة فتم ابتكار نموذج اسمه PPP - Private Public Partnership او الشراكة بين القطاع العام والخاص، ودة عملته الهند مثلا وقدرت تعمل نقلة جامدة في مشاريع البنية الأساسية عندها.

.....