اعتقد ستات كتير من اللي هتقرا البوست دا هتحس بالالم اللي كنت فيه
انا عندي 29 سنة.. الحكاية ابتدت من حوالي شهرين.. وجع في جسمي كله.. عارفين لما يجيلكوا دور برد اللي بيهدك وعضمك كله بيبقي وجعك ومبتبقيش قادرة تقومي من السرير.. شاكوش بيدق في عضم جسمي كله..ألم متواصل في ال24 ساعة وعالحال دا كل يوم ومن سيء لأسوأ 😞
وانا مش من طبيعتي كسولة.. ومش بفرهد بسرعة.. بشتغل شغلانة صعبة وفيها حركة كتير.. لقيت نفسي مش قادرة اطلع السلالم، طاقتي ومجهودي بقوا قليلين اوي، برجع من الشغل مقتولة، ونفسي انام، بس مبروحش في النوم بسهولة من الوجع
ابتديت رحلة المسكنات، مش اقل من 6 اقراص مسكن في اليوم علي كام كيس فوار
قلة النوم كانت هتجنني، ابتديت ااخد منومات، بس بصحي مدروخة وتأثيرها بيفضل معايا تاني يوم، فاضطريت ااخد منبهات، باخد اقراص green coffe الصبح عشان افوق، ومنومات بليل عشان انام. حاجتين عكس بعض بس كنت مضطرة عشان اعرف اركز، دا غير المسكنات طبعا
متحسنتش.. وفجأه لقيت سناني بتتكسر.. حرفيا بتتكسر.. ابقي قاعدة بتكلم عادي هوب الاقي ضرس وقع، ووجع السنان اقذر وجع بعد القيصري بالنسبالي، اعالج السنة دي واحشيها وكله تمام، بعديها بيومين ضرس تاني، بعديها باسبوع سنة تانية تتكسر، وهكذا لحد ما سناني كلها هيتركبلها كراونات
جربت كل المسكنات اللي تيجي علي بالكوا ومبقاش فيه حاجة محوقة فا للاسف دخلتلي كام يوم في سكة الترامادول عشان اعرف اشوف شغلي وأكمل حياتي
الدكاترة قالولي حللي calcium. طلع حلو جدا جدا، وزي الفل كمان، قولت بقا stress, depression, ماهو الكالسيوم زي الفل اهو
اتطمنت بس متحسنتش، بالعكس، وبقيت بذود في المسكنات وابتدي يجيلي اعراض قرحة
من وجع السنان كمان تفريبا مكنتش باكل، قعدت اسبوعين باكل زبادي بس، قولت اطلع عالميزان اكيد خسيت بقااااا، اتصدمت، زي ما انا، ولا كيلو، اسبوع عن اسبوع الناس ملاحظة اني بتخن وانا مباكلش، احساس يقهر.. ولما باكل اكل عادي جدا بتخن بشكل مش طبيعي
لفيت عالدكاترة شهور وحللت املاح وصورة دم كاملة وقست سكر وضغط وموصلتش لحاجة ومش فاهمة فيا ايه
لحد ما دكتور فاهم شويتين قالي حللي vitamin D, انا كنت فاكرة بدام الكالسيوم عالي يبقي طبيعي الvitamin D عالي، بس لا، طلع انه مسؤول عن امتصاص الكالسيوم، يعني مش معني ان عندي كالسيوم كتير في الدم انه بالضرورة بيمتص
تاتي حاجة الفيتامين دال بيطلع انزيم اسمه ال leptin مسؤول عن تكسير الدهون في الجسم وال energy levels عامة
اللي يعرفني عارف اني بضحك بسبب وبدون سبب💃💃.. مؤخرا بقيت نكدية بشكل مش طبيعي ومش فاهمة ليه.. عارفين جو.. مالك؟ مليش.... عندك ايه؟ معنديش😒
انا تحولت لهذه الولية مش فاهمة ليه وازاي 😅😅😅 سبحان الله نقص فيتامين دال برده له علاقة بالاكتئاب
حللت vitamin d, والنسبة الطبيعية زي ما انتوا شايفين من 30-60..انا 8..، لو كنت سبت نفسي او اتاخرت اكتر من كدة كان زماني جالي كساح 😅
ابتديت كورس حقن فيتامين دال مدته 3 شهور.. من اول جرعة حسيت بتحسن.. نشاطي احسن، مودي اتظبط.. وجع عضمي وسناني تقريبا راح
وعلي فكرة انا بتعرض للشمس كل يوم وبعشق حاجة اسمها لبن وباكل سمك لحد ما، فا معرفش انا حصلي كدة ازاي
اتمني اي واحدة تحس بالاعراض دي بالذات بعد الحمل.. تحلل ومتسبش نفسها زيي، انا صحتي اتدمرت الفترة اللي فاتت بسبب اهمالي..الحقن رخيصة وهتحسوا بفرق من اول جرعة.
اكيد ليكوا حد من معرفتكوا سواء صحاب او امهات مروا بالأعراض دي.. متبخلوش عليهم بالمعلومة
#فيتامين_دال
ليست هناك تعليقات:
إرسال تعليق