Google+ Badge

السبت، 5 ديسمبر، 2015

تعرف علي اراء وخبرة من استعمل اجهزة التصوير

أخى الكريم زميل القرية الإليكترونية ..

أنقل لك خبرتى المتواضعة جداً فى ماكينة ريكو 1224/1232 ، فقد اشتريتها من شركة بالجيزة اسمها الأنصار .. 

مبدئياً سعر الحبر ( اربع عبوات بأربع ألوان ) كان حوالى 1400 جنيه .

سعر الماكينة كان ( 9000 ج ) و عرفت بعد كده انها بحوالى 3500 ج فى أماكن أخرى .

جاءت لى كمية حوالى 12000 ورقة كتاب أطفال و به بعض الألوان البسيطة جداً ..

الماكينة نفذت حوالى 6000 ورقة و ( قطعت النفس ) .. الدرام عطل و المجناتيك بتاع الحبر .. و مش عارف ايه تانى ..

فتعلمت بعد ذلك شئ ضرورى جداً ..

1- الماكينة كانت تعمل بدرام يسمى ( ترانسفير بلت ) و ذلك أسوء أنواع الطباعة .. لأنه أعتقد قريب من شئ اسمه طباعة الماستر و دى نوعية قديمة من الطباعة .

2- الماكينة يوجد بها درام واحد فقط - إذا الماكينة محتاجه تصور على الدرام أربع مرات لغاية ما تعمل الورقة الواحدة اللى هى أصلاً بتتكون من أربع ألوان .

3- التكلفة عمرها ما هتكون اقتصادية بالسعر المذكور لأن الماكينة تقريباً خلصت الحبر فى 6000 ورقة إذا تكلفة الورقة هاتكون حوالى 25 قرش ..
و دى تكلفة الحبر فقط ، احسب أيضاً تكلفة الماكبنة و اهلاكها و الكهرباء و العامل و الصيانة ..

4- يا سلام كمان لو جالك حد من ( مباحث تزييف الأموال ) مش هاقولك على اللى هايحصل .. فى حالة عدم وجود ترخيص للماكينة مستقل تماماً عن تراخيص المحل ..

5- الماكينات المستعملة ليس لها ترخيص على حد علمى ..

6- الورق الكرتون و ورق الكروت ليس صحى بالنسبة لهذه الماكينات لأن تروسها ضعيفة جداً و لا تستحمل الهلك ..
المهم بعد كل ده أنا مش عايزك تتعقد و عايزك تعمل خطوات سهلة جداً ان شاء الله علشان ربنا يباركلك فى هذا العمل :

1- اشترى ماكينة مش 70 ورقة زى ما انت قلت .. لأ اشترى ماكينة 35 ورقة فقط ..

2- الماكينة ان شاء الله هاتكون باربعة درامات لأن السرعة دى عالية بالنسبة للألوان .

3- لا يكون الدرام ترانسفير بلت و لكن يكون tandum إذا كان كلامى صحيح ..

4- اشترى الحبر من أى موقع منتجات صينية مثل madeinchina.com لأن السعر هايكون حوالى نصف السعر هنا .

5- حاول تظبط موضوع التراخيص و تسأل عنه كويس قبل ما تصرف فلوس فى هذا المشروع لأنى سألت محامى و قاللى المستعمل مالهوش ترخيص ..

6- نفس الماكينة الجديدة من ريكو 35 صورة و اسمها 3500c سألت فى التوكيل لقيتها بـ 80 ألف جنيه ..

7- الماكينات الكانون أفضل من الريكو عن تجربة حوالى 12 سنة مع الكانون و حوالى 4 سنوات مع الريكو . و لكن سعر الريكو أفضل بالنسبة لأن إمكانياته كثيره . حيث الماكينة الريكو تكون بـ 7 آلاف جنيه ( أسود ) يكون مثلها بالضبط كانون فى حدود 11000 جنيه . و علشان الريكو بيستهلك أكثر تجد قطع غياره متوفرة من الماكينات التقطيع أكثر من الكانون لأن قطعة غيار الكانون الأصلية ذى بالضبط السيارة اليابانى تضع القطعة و تنساها لكن الريكو ممكن بعد ما تغير القطعة تلاقى قطعة أخرى تلفت نتيجة تلف القطعة الأولى ..

انا عارف انك بعد ما تقرأ الكلام ده هاتبعد عن المشروع و هاتجيب ماكينة سلك سكرين لأنها أفضل بالنسبة لشغلك و لكن انت ادرى باحتياجاتك ..
( أخوك ايهاب .. كنت اعمل بنفس مجالك من سنة 90 ) .. 

إرسال تعليق