شارك برايك يهمنا Feedback Feedback mhassanabo@gmail.com
maboeleneen@yahoo.com
maboeleneen@yahoo.com
دين أبونا يا مسلمين
في يقيني أعز دين
كلمة النور الأمين
كلمة الحق المبين
حكمة يكتبها الإله
فوق جبين الطيبين
دين أبونا يا محمد
إنت سره ومبتداه
إنت إحساسه ومداه
كلمه عارفينها في قلوبنا
لما نخشع للإله
لما نطلب يوم رضاه
لما نركع لما نسجد
لما نفرح بالحياه
دين أبونا إبراهيم
رش جمر النار حنين
على الخرائط والأماكن
إتولدنا طوافين ذاكرين
دين أبويا لو مسيحي
رحمه لأجل العالمين
نصرة لأجل المظلومين
كلمة الحب اللي بايس
الصليب جوا الكنايس
ندهة الأجراس لمريم
والأمان للمجدلية
رحمة ليكوا ورحمة ليا
المسيح شايل ألمنا
لأجل يهدينا السلام
خد أيمن خد أيسر
العبادة ماهيش كلام
عيش باسم الإنسانية
وإنسى نية تدفعك للإنتقام
دين أبويا دين إلاهي
أينما كان إتجاهي
حتى لو كان دين يهودي
إحنا مش ضد اليهود
موسى في القرآن وليد
يحضنه نيل الخلود
بين إديه تسعى عصاته
حيه وجدودنا شهود
سحره آمنوا برب موسى
إنقسم له بحر عاتي
والجبل عرف السجود
رجعت الحية عصايه
حضنت التوراة وصايا
أوعى تقتل أوعى تسرق
أوعى تزني
أوعى تقبل بالخضوع
بحر خير الكون يواتي
لما نفرد له القلوع
والجحيم ياكل سنينكوا
لو فقير فيكم يجوع
الوصايا هي هي
أرتضيها زي ماهي
في ضميري وفوق شفاهي
دين أبويا دين إلاهي
أينما كان إتجاهي
حتى لو كان مش إلاهي
المجوسي يترعب من النار
ويعبد الإله اللي في خياله
ليه حرامه وليه حلاله
تسمعه في معبد دعاء
تلهمه رعشة رجاء
للبقر ناس يعبدوه
ويدينوا له بالولاء
مش غباء
تفرفوا في البقره
إيه بيقدسوه – العطاء
دين أبويا أي دين
فيه عصاه أو مخطئين
بس في نهاية المطاف
فيه ملايكة ومؤمنين
والرضا للصالحين
والهنا للصابرين
فيه ملاذ للعابدين
الشاكرين المشتاقين
رغم الضياع لليقين
دين أبويا أي دين
اللي أنا بأه ما أعرفوش
الوحوش الكروش
اللي لو كالوا رقابينا
بينهشوا ما برحموش
دين أبوهم إسمه إيه
اللي داسوا فوق رئوسنا بالبيادة
اللي مشيوا بالبلاد للبلادة
اللي فتاويخم فساد للعقل
يقضي على العبادة
اللي مسحوا من الآيات معنى الشهادة
دين أبوهم إسمه إيه
لوثوا الدم في عروقنا
سدوا عين الشمس فوقنا
سرقوا ضوءنا
صادروا نيلنا ودفعونا
ثمن وضوئنا
دين أبوهم إسمه إيه
اللي باع وطن بحاله
خضرته وصفرة رماله
نسوته وشهوة رجاله
بهجته ودمه وعياله
خطوته وسنين نضاله
ثورته ضد إحتلاله
دين أبوهم إسمه إيه
مين إلهه مين رسوله
فين كتابه
فيه ملايكه ولا غابوا
فيه شياطين ولا تابوا
لما شافوا التابعين شرهم زاد
عن جهنم شر لا يمكن حسابه
دين أبوهم إسمه إيه
حتى فرعون اللي صدق
إنه من نسل اللإله
واللي قال إنه الإله
كان بيبني الأهرامات
للممات قبل الحياه
كان له بعث ويوم حساب
كان له دوله حضور إدارة
كان مناره ترشد الكون للحضارة
كان له جيش فارض وجوده
كان محارب بين جنوده
واما يتجاوز حدوده
كان له رب يغرقه وينقذ يهوده
حتى فرعون اللي صدق
إنه من نسل اللإله
واللي قال إنه الإله
كان له كهنه في العلوم
يقروا في كتاب الكواكب
يرصدوا سير النجوم
يفتحوا له سكك بيبان
في سراديب الزمان
ويقولوا له إزاي يدوم
حنطوه خلدوه
بالمعاني والمباني والرسوم
كانوا كهنه مؤمنين
خلوا كلمة مصر دين
جاضرة في العهد القديم
جاضرة في العهد الجديد
حاضره في القرآن حضور
الآيات فيها تدور
مفردة عز وجلال
معلنة وبين السطور
تخترع ثانية وشهور
تخترع شعر وبحور
حتى فلاحها الفصيح
شكوته بتشع نور
إيه يا مصر
إيه يا أرض الطيبين
اللي حكموا في الزمان ده
يبقوا مين
دين أبوهم إسمه إيه
حد يعرف فيكوا دين
كل أتباعه لصوص أو قوادين
في المعاصي مولودين
في الكراسي مأبدين
في التفاهه معدودين
قي السفاهه مفرودين
على البلاهه مسنودين
للشراهه مجندين
على القرف متعودين
على الشرف متمردين
على الوطن متنمردين
بالخيانه موحدين
اللي يعرف دين كده
يقوللي عليه
دين أبوهم إسمه إيه
وإحنا فى عز السكوت!
- بخيت بيومي:
بعد السكوت بقى لينا صوت..
أعلى كمان من أى صوت..
بعد ما كنا منهوبين..!!
ومظلومين ومكتومين..!!
وشعب جاع
وف صراع
وصوتنا ضاع
من خير بلدنا محرومين..!!
مش لاقى عيش ولا نشتكيش عايزين نعيش
ولو شكينا نقول لمين..؟!
ونظام وباطل..
وشعب عاطل..
غرقان مشاكل..
مش م النهاردة ده من سنين
الفقر ساكن..
جوه المساكن..
ملناش أماكن..
أحرار ولكن محبوسين..
وشعب كان على وش موت..
وهوه فى عز السكوت..
مقدرش ينطق اتخرس
صوته من الظلم انحبس..!!
وف نن عينه بيتقرص..!!
ومن الخَلَف..
صابه التلف..
راح استلف..
واما اتهوس عقله اتلحس..!!
ملقاش نصير ولا ونس..
وف مجلس الشعب اتنكس..
وحالته حالة..
نواب عوالة..
مفيش عدالة..
وبيته م الستر اتكنس..!!
مفضلتش فيه غير الفلس..!!
وكان حيقطع النفس..!!
وكأنه داخل بطن حوت..!!
واحنا فى عز السكوت..
والثورة نايمة فى البيوت..!!
* * *
الشعب كله ينموه..
بقانون طوارئ سكتوه..
وبأى حاجة يشغلوه..
ويأخدوا صوته وزوروه..
وينجحوه ويسقطوه..
وتاريخه طبعاً زيفوه..!!
ويطلعوه..
وينزلوه
وبعد حتى ماجوعوه
عايزين كمان يورثوه..!!
ودوخوه..!!
وخصخصوه
وف عز ما هما بينهبوه..!!
على رجل واحدة وقفوه..!!
فى الطابور علشان رغيف..!!
مع انه شعب مش ضعيف..!!
اصطادوه
جوعوه..!!
فى الشوارع توهوه..!!
ناقص ياعينى يبنجوه..!!
ويكتفوه..
ويشرحوه..!!
ويدخلوه حى فى تابوت
جايز يعيش جايز يموت..
واحنا فى عز السكوت..!!
والثورة ساكنة فى البيوت..!!
* * *
مع اننا منذ القدم..
واحنا هنا خير الأمم..
عبر التاريخ..
مصر الكرامة..
والشهامة والهمم..
مصر الحضارة والهرم..
وشعب هايل محترم..
وبعد ما رفع العلم..
عاملوه كأنه
قطيع غنم..!!
وإن المواطن فى الوطن
أصبح حجر
اصبح صنم
مكتوب على جبينه العدم
ويعيش زمن
غير الزمن
مليان عفن مالوش تمن..
ويندفن من غير كفن..
فى قبر مليان عنكبوت..!!
واحنا فى عز السكوت..!!
والثورة نايمة فى البيوت..!!
* * *
سعرنا فى السوق هبط..
الشعب فى دماغه اتخبط..
* مقلش آه..
سرقم شقاه..
حبة حواة.. شلة لبط..!!
عصابة حارسين الديابة..!!
يمصوا فى دم الغلابة..
شايلين سنج
شايلين بُلط
ومفيش قانون ولا يحزنون
والشعب خيره بيتشفط..!!
وناس بتهتف للنفاق..
وناس تسقف للغلط..
وناس بتبلع الحقوق..
وناس بتبلع الزلط..
استثمروا فينا الهبالة..
والبطالة والعبط..
والزرع بعد ما سرطنوه..
كان الهوى حيسعروه..
ويلوثوه
بسحابة سودة يتخلط
والشعب بهد ما جوعوه
المسلمين قبل القبط
كلنا الرغيف مليان زلط..!!
ومات بسببه الواد ياقوت..!!
واحنا فى عز السكوت..!!
الثورة خرجت م البيوت..!!
* * *
وكان صباح أول نهار
خرجو الشباب من كل دار
شباب جرئ فتحوا الطريق
الشعب كله قام وثار
كان جعان
قبل الأوان
راح الميدان من غير فطار..!!
ضد الفساد رافع شعار
شعار فريضة لثورة بيضه
مفهاش خيانة وضرب نار
فيها الجهاد
وفى الميعاد
كانو الشباب واخدين قرار
وكان خلاص فلت العيار
والأرض بتطلع شرار..!!
وشرارة واحدة تبقى نار..!!
والنار تقيد
وايد فى ايد
ومصر بتزف الشهيد
واحنا فى زحمة لنتصار...
الشعب قال
مفيش محال
زمان قالوا لنا ناس كبار..
الضغط لما فى يوم يزيد..
على طول يولد لانفجار..
فى قلب أى نار نفوت..
والشمس تطلع ع البيوت..
وصوتنا يبقى أعلى صوت..
بعد السكوت....!!
بعد السكوت....!!!
أيضا من روائع جمال بخيت
قصيدة جمال بخيت
الواد كبر
ابنى العظيم ابنى الجميل
ابنى اللى قادر ينتصر على المستحيل
الدنيا قاعدة ف مجلسه
وله مهابه يحسها كل البشر
اللى ف حضوره اتعطروا
واللى ف هواه اتنفسوا
كل الكبار .. ولاّ الصغار
لو قربوله ..
بيهمسوا
كلماته شعر
مفتى .. وعالم عبقرى
كوم التراب يصبح دهب
لو لمسه واحدة يلمسه
الواد كبر
تجيبوله جيش .. هايطوره
تجيبوله عصر من الجهاله
ينوره
تجيبوله سد ..
بطرف إيده .. يهندسه
الواد فهم
من غير ماحد يعلمه معنى العلام
من قعدته ف مجلسى
درس الحروب قبل السلام
هضم المذاهب كلها
سَرّبت له بين السطور
علم النفور والانسجام
علمته ينظر للبشر
وف عينه مليون اتهام
يرمى بذور الخوف ف دقة قلبهم
ومن الوشوش
يحصد نسيم الابتسام
الواد كبر ..
وكبر معاه وطنه الأشم
الواد كبر ولازم له هم
ولازم له قصر
ولازم له عرش وصولجان
وحدود وحاشية ومهرجان
ممكن كمان
سيرك وجنينة حيوانات
سجن ومعارضة .. وتضحيات
وحزب من اهل الكلام
يدبجوله ف الخطب
ويحفّظوه بعض النصوص
وهيلمان وزرا ولصوص
شوية منهم يسرقوا
وشوية ياخدوا حقهم
لما يوزع ف الوطن ويفرقه
قلب الوطن .. لجل التخين
راس الوطن .. لجل الكهين
داعر لطيف
اكبر حرامى ومدعى انه الشريف
عين الوطن ..
معروفة طبعا لجل مين ..
للمخبرين ..
الواد كبر .. ولازم له شعب يهرسه
وقانون عظيم
بإشارة واحدة ينشره
واشارة تانيه .. يحبسه
ولازم له منهج حكم
- لكن معتبر –
ع الخوف ضرورى يأسسه
ولازم له كلب من الصحافه
يمدحه ..
وف وقت عوزة ..
يقدسه ..
وينزهه عن الغلط .. أو العبط
وف عز اصعب وقت ف ليل الوطن
يقعد معاه ..
يونسه
ويجيب له شمس .. تشمسه
الواد كبر
وصبح علامة للنبوغ ..
الواد خلاص قرب يطول
سن البلوغ ..
ولازم له كرسى ينجسه
ولازم له مجلس للموافقة والسكوت
وان يوم نسى وطلع له صوت
يتربسه ..
ولازم له كهان للثقافة
عند اللزوم
يتمومسوا ..
ولازم له خُدام .. للنظام
على الجميع يتجسسوا
ولازم له حبة بلطجية من التقال
أولاد حلال
جوه المظاهرة ينكسوا علم البلاد
ويهتفوا بحب الفساد
ويلزقوا ف مُزز المعارضة
يقفّشوا .. ويحسسوا
الواد كبر
واظنه زيي
ما لوهش قلب
والحكم حلو وابن كلب
كفاية شكل الحاشية
لما بيسجدوا
من غير سجود
ساعة ما يعتبروا الرضا منى
صعود
أو لما ياكلوا ف بعض
علشان يفوزوا ببسمتى
وسط الحشود
يتنططولى ويرقصوا زى القرود
الواد كبر
ولازم له حلم يمتعه
ولازم له حصة تشبعه
ولازم له حاشية يبرطعوا
يترّبعوا
يتطمعوا
يدّلعوا
واذا واد معارض
حب يعمل فيها مسمار
يخلعه
يقلع عينيه .. ويأدبه
وف أى صحرا
يقلّعه
الواد كبر
واياك يا شعب تزهقوه
أو تقرفوه
وتطلعوله من النكت
زى اللى طلعت عن أبوه
اسمع يا واد
الشعب ده ..
وضع أساس النمردة
وإياك ف مرّة تدلعه
إكبس عليه ..
يا تركعه .. يا تطمعه
اسمع يا واد
اول دروس حب الوطن
سيب اللى نادوا بإسم غيرك
يولعوا
وسيب مصارين بطنهم
- من حقدهم -
يتقطعوا
اسجد لآلهة الحياة
وافتح لهم باب البلاد
هاتفوز بأسباب النجاة
وتفوز بأرواح العباد
اسمع يا واد
أول دروس حب الوطن
ما ترتبطش بالوطن
ولا ف سر ..
ولا ف علن ..
وحب نفسك أولاً ..
سيبه يجوع
يعطش .. يغيب ..
أو يتفلق
انت الحقيقة الثابتة
من قبل هو ما يتخلق
اسمع يا واد
إياك تصدق
ان فيه حاجة اسمها
حب الوطن
العرش اكبر م اليقين
العرش .. دين
العرش هو اللى جعلّك مخلصين
بيوحدوك
العرش للحاكم وطن
والناس عشانه يقدسوك
أو يشنقوك
اسمع يا واد
انا هنا لآخر نفس
من غير شكوك
ها تقولى : ليه ؟!
العرش جنة خُلد للجالس عليه
جنة خصوصى للاباطرة والملوك
ولو جلست انت عليه
كل الرعايا ..
ها يتركونى ويتبعوك
وانت
- بدون احساس بذنب -
من نشوتك
ها تبيع أبوك
ابنى العظيم ابنى الجميل
ابنى اللى قادر ينتصر على المستحيل
الدنيا قاعدة ف مجلسه
وله مهابه يحسها كل البشر
اللى ف حضوره اتعطروا
واللى ف هواه اتنفسوا
كل الكبار .. ولاّ الصغار
لو قربوله ..
بيهمسوا
كلماته شعر
مفتى .. وعالم عبقرى
كوم التراب يصبح دهب
لو لمسه واحدة يلمسه
الواد كبر
تجيبوله جيش .. هايطوره
تجيبوله عصر من الجهاله
ينوره
تجيبوله سد ..
بطرف إيده .. يهندسه
الواد فهم
من غير ماحد يعلمه معنى العلام
من قعدته ف مجلسى
درس الحروب قبل السلام
هضم المذاهب كلها
سَرّبت له بين السطور
علم النفور والانسجام
علمته ينظر للبشر
وف عينه مليون اتهام
يرمى بذور الخوف ف دقة قلبهم
ومن الوشوش
يحصد نسيم الابتسام
الواد كبر ..
وكبر معاه وطنه الأشم
الواد كبر ولازم له هم
ولازم له قصر
ولازم له عرش وصولجان
وحدود وحاشية ومهرجان
ممكن كمان
سيرك وجنينة حيوانات
سجن ومعارضة .. وتضحيات
وحزب من اهل الكلام
يدبجوله ف الخطب
ويحفّظوه بعض النصوص
وهيلمان وزرا ولصوص
شوية منهم يسرقوا
وشوية ياخدوا حقهم
لما يوزع ف الوطن ويفرقه
قلب الوطن .. لجل التخين
راس الوطن .. لجل الكهين
داعر لطيف
اكبر حرامى ومدعى انه الشريف
عين الوطن ..
معروفة طبعا لجل مين ..
للمخبرين ..
الواد كبر .. ولازم له شعب يهرسه
وقانون عظيم
بإشارة واحدة ينشره
واشارة تانيه .. يحبسه
ولازم له منهج حكم
- لكن معتبر –
ع الخوف ضرورى يأسسه
ولازم له كلب من الصحافه
يمدحه ..
وف وقت عوزة ..
يقدسه ..
وينزهه عن الغلط .. أو العبط
وف عز اصعب وقت ف ليل الوطن
يقعد معاه ..
يونسه
ويجيب له شمس .. تشمسه
الواد كبر
وصبح علامة للنبوغ ..
الواد خلاص قرب يطول
سن البلوغ ..
ولازم له كرسى ينجسه
ولازم له مجلس للموافقة والسكوت
وان يوم نسى وطلع له صوت
يتربسه ..
ولازم له كهان للثقافة
عند اللزوم
يتمومسوا ..
ولازم له خُدام .. للنظام
على الجميع يتجسسوا
ولازم له حبة بلطجية من التقال
أولاد حلال
جوه المظاهرة ينكسوا علم البلاد
ويهتفوا بحب الفساد
ويلزقوا ف مُزز المعارضة
يقفّشوا .. ويحسسوا
الواد كبر
واظنه زيي
ما لوهش قلب
والحكم حلو وابن كلب
كفاية شكل الحاشية
لما بيسجدوا
من غير سجود
ساعة ما يعتبروا الرضا منى
صعود
أو لما ياكلوا ف بعض
علشان يفوزوا ببسمتى
وسط الحشود
يتنططولى ويرقصوا زى القرود
الواد كبر
ولازم له حلم يمتعه
ولازم له حصة تشبعه
ولازم له حاشية يبرطعوا
يترّبعوا
يتطمعوا
يدّلعوا
واذا واد معارض
حب يعمل فيها مسمار
يخلعه
يقلع عينيه .. ويأدبه
وف أى صحرا
يقلّعه
الواد كبر
واياك يا شعب تزهقوه
أو تقرفوه
وتطلعوله من النكت
زى اللى طلعت عن أبوه
اسمع يا واد
الشعب ده ..
وضع أساس النمردة
وإياك ف مرّة تدلعه
إكبس عليه ..
يا تركعه .. يا تطمعه
اسمع يا واد
اول دروس حب الوطن
سيب اللى نادوا بإسم غيرك
يولعوا
وسيب مصارين بطنهم
- من حقدهم -
يتقطعوا
اسجد لآلهة الحياة
وافتح لهم باب البلاد
هاتفوز بأسباب النجاة
وتفوز بأرواح العباد
اسمع يا واد
أول دروس حب الوطن
ما ترتبطش بالوطن
ولا ف سر ..
ولا ف علن ..
وحب نفسك أولاً ..
سيبه يجوع
يعطش .. يغيب ..
أو يتفلق
انت الحقيقة الثابتة
من قبل هو ما يتخلق
اسمع يا واد
إياك تصدق
ان فيه حاجة اسمها
حب الوطن
العرش اكبر م اليقين
العرش .. دين
العرش هو اللى جعلّك مخلصين
بيوحدوك
العرش للحاكم وطن
والناس عشانه يقدسوك
أو يشنقوك
اسمع يا واد
انا هنا لآخر نفس
من غير شكوك
ها تقولى : ليه ؟!
العرش جنة خُلد للجالس عليه
جنة خصوصى للاباطرة والملوك
ولو جلست انت عليه
كل الرعايا ..
ها يتركونى ويتبعوك
وانت
- بدون احساس بذنب -
من نشوتك
ها تبيع أبوك
ليست هناك تعليقات:
إرسال تعليق